Bütün dünyadakı həkimlər insanın DNT-sinin sirlərini anlamağa çalışırlar. Bu çox mürəkkəb bioloji kodda sağlamlıqla bağlı bütün informasiyalar toplanıb. Hətta DNT-də insanın gələcəkdə necə yaşaya biləcəyi və övladlarına nəyi miras buraxacağı ilə bağlı sirlər də yatmaqdadır. DNT-nin qohumluq əlaqələrini müəyyənləşdirdiyi də məlumdur. Məhz bu unikal vasitə uşaqların atalarının müəyyənləşdirilməsində mühüm rol oynayır. İndi isə amerikalı alimlər DNT ilə bağlı yeni xidmət təklif edirlər. Doktor Stiven Kveyk onlara müraciət edən xəstələrdə genetik sistemin pozğunluğu və digər xəstəliklərin 99,9 faiz dəqiqliyi ilə müəyyənləşdirilməsinə çalışdıqlarını iddia edir. Kaliforniyanın Stenford şəhərindəki tibb müəssisəsində işləyən bioenerji professoru göstərdiyi xidmətlərə görə nə az, nə çox - düz 50 min dollar istəyir. Bu pulun müqabilində isə müsbət nəticəyə 100 faiz zəmanət verilir. Mütəxəssis vurğulayıb ki, DNT analizi sağlamlıqla bağlı bütün həqiqətləri ortaya qoyur. Professorun sözlərinə görə, bu analizlə bağlı üzə çıxan məqamlar o qədər də ürəkaçan olmaya bilər. Çünki hansısa xəstəlik obyektiv səbəblərə görə özünü büruzə vermir. Müəyyən vaxta qədər onlar insan orqanizmində gizli olaraq qalmağı bacarır: "Bu səbəbdən DNT diaqnostikası sağalmaz xəstəliklərin sonradan özünü büruzə verməsinin qarşısını almaq üçün çox xeyirlidir. Bu xəstəliklər sırasına isə altsgeymer, şəkərli diabet, kökəlmə, xərçəng, genetik mutasiyanın çətin forması, ürəktutmaları və sair daxildir". Lakin bu metod elmi aləmdə fikir ayrılığı da yaradıb. Bir sıra mütəxəssis bildirir ki, DNT-nin dəqiq diaqnostikası üçün texnologiya hələ bir qədər də təkmilləşdirilməlidir.