Alman həkimlərinin fikrincə vaksinasiyada tatuirovka texnikasından istifadə edilməsi onların effektivliyini artıra bilər. Onların fikrincə vaksinlərin orqanizmə tatu metodu ilə yeridilməsi immun sistemini daha çox stimullaşdırır.
Qeydelberqdəki xərçəng tədqiqatları mərkəzinin alimləri siçanlara insan DNK-sının papillomavirus franqmentləri olan eksperimental vaksin vurublar. Siçanların yarısına preparat adi yolla, digərlərinə isə tatu maşınlarının köməyi ilə yeridilib. Nəticələr tgöstərib ki, tatu metodu ilə vaksinasiya edilmiş siçanlarda orqanizmin virusa qarşı ifraz etdiyi maddə digər qrupdakı siçanlara nisbətən 16 dəfə artıq olub. Bu cür nəticəni alimlər vaksinin daha artıq sahəyə yeridilməsi ilə izah edirlər. Qeyd edək ki,iynə vurulan zonada iltihablaşma zonasının böyük olması özü də immun sisteminə əlavə stimul verir.
Xatırladaq ki, tatu metodunun əsas üstünlüyü onun adi inyeksiyalardan fərqli olaraq bir vaksini dərinin çoxsaylı nöqtələrinə vurmasıdır.
Ancaq tatu metodu ilə vaksinasiyanın ağrılı və uzun çəkən bir prosedur olduğundan onun yaxın gələcəkdə profilaktik məqsədlərlə istifadəsi ağlabatan sayılmır. Uşaqların sözügedən metodla vaksinasiyasından isə ümumiyyətlə söhbət belə gedə bilməz. Bununla belə yeni vaksinasiya növü profilaktik məqsədlərlə və ev heyvanlarının vaksinasiyasında tətbiq edilə bilər.