Vyanadakı ətraf mühitin mühafizəsi institutunun alimləri müəyyənləşdiriblər ki, mobil telefondan daimi istifadə edən insanların qulaqlarında əlavə səslər yaranır. Araşdırmalar göstərir ki, gün ərzində 10 dəqiqə telefonla danışan insanlarda bu hallara daha çox rast gəlinir. Belə ki, onların qulaqlarında bu cür əlavə səslərin yaranması risqi 70 faiz artır. Mütəxəssislər vurğulayıblar ki, onların bu araşdırmaları son zamanlar qulaqlarında əlavə səslərin yaranması ilə bağlı həkimə müraciət edən insanların düzgün diaqnozla müalicə olunmasında önəmli rol oynayacaq. Bildirilir ki, bu problemin əmələ gəlməsinin əsas səbəblərindən biri məhz mobil telefonlarda quraşdırılmış mikrofonlardır. Qeyd edək ki, qulaqlarında xroniki olaraq əlavə səslərin əmələ gəlməsindən Yer üzü əhalisinin 3 faizi əziyyət çəkir. Bunun səbəbləri ilə bağlı hələ də dəqiq elmi diaqnozlar yoxdur. Bircə o məlumdur ki, belə hallar daha çox beyinin eşitmə funksiyasına nəzarət edən hissəsində pozulmalar baş verərkən yaranır.